حملة “مراية الطلاق”.. مشروع تخرج لطلاب كلية إعلام جامعة أكتوبر

الحدث – القاهرة – منار الليثي

نبذة عن الطلاب

إحنا 3 طالبات من كلية إعلام جامعة أكتوبر للعلوم الحديثة والآداب (MSA)، أطلقنا حملة “مراية الطلاق” كمشروع تخرج، والحملة هدفها تسليط الضوء على المعاناة اللي بيعيشها الأطفال بعد طلاق أهلهم، خاصة إهمال الأب ليهم سواء عاطفيًا أو ماديًا.

الهدف من فكرة المشروع 

في مجتمعاتنا، بنشوف كتير أطفال بيتأذوا نفسيًا بسبب الطلاق، سواء من مشاكل بين الأب والأم قدامهم، أو من إهمال أحد الطرفين ليهم بعد الانفصال. الأطفال دول صوتهم مش بيوصل لحد، ومحدش حاسس بمعاناتهم، عشان كده قررنا نفتح الموضوع ده من خلال حملتنا، ونوصل صوت الأطفال اللي اتظلموا.

حملة “مراية الطلاق” مش مجرد كلام، إحنا بننقل قصص حقيقية عن أطفال عانوا بسبب الطلاق، وبنحاول نوصل رسالة قوية لكل أب وأم إن الطلاق مش نهاية مسؤوليتهم تجاه أولادهم. بنأكد على أهمية الدعم النفسي والاجتماعي للأطفال، وإن احتياجاتهم العاطفية والمادية لازم تفضل أولوية مهما حصل بين الأب والأم.

إحنا عايزين نوصل الحملة دي لأكبر عدد من الناس، وننشر الوعي بأهمية احتواء الأطفال بعد الطلاق. دعمكم هيكون مهم جدًا، بنشر الحملة عشان نوصل الرسالة لكل بيت.

وشكر خاص جدًا للدكتورة رانيا شعبان على مساعدتها ودعمها لينا في مشروع التخرج.