علي بابا والاربعين حرامي

الحدث – القاهرة – بقلم دكتورة فاطمة حسين

اغنية اسمها علي بابا مفروض انها طبعا اغنية اطفال بتتذاع على قناة لونا بس قصة الاغنية مختلفة عن اللي نعرفه عن علي بابا هما عندهم علي بابا مختلف 😁
المهم علي بابا ده بقي يا سيدي كان ماشي في امان الله وقعت عليه تفاحة غسلها وكلها وشكر ربه على فكرة الاغنية بدايتها كده فعلا
وبعدين وهو قاعد بياكل التفاحة اذ فجأة لقى الحرامية داخلين كهف وبيقولوا كلام غريب اوي عشان يفتحوا الكهف ايه الكلام الغريب ده بقي هو ( افتح يا سمسم ) 😁😁
اتخض وخاف وكان هيجري بس قرر يرجع تاني بعد ما الحرامية مشيوا ودخل الكهف واخد الفلوس ووزعها على الفقراء 🕊🕊
نستفيد ايه بقي من هذا اللقاء الغير التافه نزولا على جمهوري الحبيب اللي هما اتنين تلاتة اللي قالولي ان الكلام على الكارتون واغاني الاطفال غير تافه
المهم نستفيد ان الاغنية بتنمي عند الطفل ان السرقة عادي لو بتسرق من حرامية ولو هتوزع الغنيمة دي على الفقراء
طبعا ده كلام فارغ ومفيش حاجة في الدنيا تبرر اي جريمة سواء سرقة ولا قتل ولا غيره
حتى لو كان المقصد انك هتسرق حرامي فعادي وحتى لو كان انك هتساعد الفقراء مفيش حاجة اسمها تعمل خير بفلوس حرام
تاني حاجة نستفيد منها وأكدت عليها في كل بوست يخص الاطفال والكارتون وهو ان متسيبوش اطفالكم للكارتون لوحدهم يشكل دماغهم ووعيهم على افكار فاسدة
هسيب الاغنية في اول تعليق على فكرة ممكن تعجبكو اللحن بتاعها وصورها طبعا لانها حلوة بس ده اسمه السم في العسل
#التربية_الحديثة #تأملات #علي_بابا و #الاربعين_حرامي
#فاطمة_حسين