دكتورةً فاطمة حسين تكتب : شوية نصايح عالماشي ازاي اخلي أولادي يحبوا بعض ؟

الحدث – القاهرة

شوية نصايح كده على الماشي وكل عام وانتم بخير 😄😘

ازاى اخلي ولادي يحبوا بعض؟؟؟
ازاى احبب ولادي في بعض

1/اول حاجة لازم اخد بالي منها هي علاقتى باخواتي لان علاقتي باخواتي هتوصل للطفل(الناس اللى ممكن تتكلم علي اخواتها قدام الطفل .. اللى بتذم فى اختها قدام الطفل .. الطفل علي فكرة بياخد باله من ده ومش بيتربى على حب اخواته لان القدوة نفسها غايب عنها التفاصيل دي !!

-جزء تانى برضه غلط فى التعامل مع الاخوات هو اننا بنهتم باخواتنا على حساب ولادنا يعنى مفيش توازن اما ام مثلا ماتذكرش اختها بالخير قدام ولادها او اب يعاقب ابنه مثلا لمجرد ان ابن اخته اشتكى انه ضربه مينفعش عشان تثبت حبك لاخواتك يكون على حساب ولادك من غير ماناخد بالنا ان دول اطفال لازم نسمع نشوف مين غلط فعلا مش نتحامل على طفل مجاملة لحد

2/ نقطة الفتنة علي بعض دايما الاطفال اللى الام بتشتكي وتقول ولادي فوق رؤوس بعض اكيد بيفتنوا على بعض طول الوقت والام مبتبقاش عارفة تتصرف ازاى ؟!

-واحتمال كبير يكونوا الاهل هما اللى وصلوا الاطفال لكده لانها بتسمع فتنتهم علي بعض وتستجيب ليها الحل الام هنا اي طفل يجى يفتن علي اخوه تقوله طالما انا مشوفتش يبقي بلاش تفتن وتعرفه ان الفتنة حرام

3/النقطة دى هى بديلة عن الفتنة وهي مسابقة تعملها بينهم ان اللى هيلاحظ حاجة حلوة على اخوه يجى يقولها اى حاجة ناخد بالنا منها حلوة نيجى نقولها وتعمل مكافأة ولو بونبونى لكل حد هيقول ميزة فى اخوه مثال (ماما اخويا علق هدومه فى الشماعة / ماما اخويا غسل ايده / ماما اخويا بيكتب بخط حلو ) اللعبة دى اسمها العين الحلوة ..👁❤

4/احكيلهم قصة سيدنا موسي لما دعى ربنا وقاله اشدد به ازري وقد ايه الاخ اللى بنختاره سند وهو الصاحب الدايم فى الحياة ❤

5/ركز فى شكوتهم لان في شكاوى بسمعها منهم من باب تنفيس الطفل عن غضبه .. لكن في شكاوي لما تتكرر اعرف ان حد فيهم فعلا قلبه مش صافي من التانى الشكاوي من نوع ( ياماما ده كل شوية يقولى يا تخين / يا فاشل / يا وحش ) نوع من الشكاوى بيعبر ان فى طرف فيهم بيضايق التانى فعلا ولو ما حصلش مناقشة فى الشكوي دى مش هنخلص ومش هيصفوه اتجاه بعض من غير ما الام تشوف مين الطرف الغلطان وتقعد تتكلم معاه

6/التفرقة بين الاخوات من جانب الاهل سواء لقرب طفل عن طفل من امه او والده مثلا لانه طفل مريض او لسه صغير او مش بيعرف ياخد حقه فالام من غير ما تاخد بالها فرقت والاطفال عامة مش بيراعوا الا اللى بيشفوه هياخدوا بالهم من التفرقة

7/خد بالك من المقارنة لان المقارنة اللى من نوع محمود النهاردة احسن من احمد حتى ولو على سبيل تشجيع احمد غلط طالما هتذكرى مميزات حد لازم تذكرى التانى برضة عمل ايه حتى لو حاجة بسيطة حتى لوحاجة مش جديدة ومتعودة انه يعملها

8/ الهدايا حتى لو قلم جاف جيبي لطفل وقوليله يديها لاخوه من غير ما يقول انك انتى اللى اشترتيه (تهادوا تحابوا ) نقطة الهدية دى بتفرق فى نفوس كل الناس

9/ علمهم ان الصغير بيحترم الكبير والكبير بيرحم الصغير

10/ قولهم من وراء بعص كلام ايجابي على بعض( اختك النهاردة قالت عليكى طيبة ) حتى لو مقالتش احنا حتى ده مسموح فى ديننا طالما بنصالح طرفين ببعض

11/الفراغ من الحاجات المهمة خدى بالك كل ما كانوا فاضيين هينشغلوا بالخناق مع بعض .. جبلهم انشطة يشاركوا بعض فيها .. من وقت للتانى وقتهم يبقى مشغول بحاجة

12/ ثقافة اسف وشكرا عوديهم يقولوا اسف لما يغلط وشكرا لما حد يعملوا حاجة كويسة وانتى اعملى كده معاهم

13/اى حاجة الاحظها عن حب الاخوات فى مسلسل فى الشارع فى كرتون هو بيتفرج عليه افضل اقولهم ده بيعمل كده عشان بيحب اخوه وهكذا .. خد بالك متستناش النتيجة الوقتية انك تزرع فيهم حب بعض ده شئ اساسي حتى لو مفيش بينهم خلاف .. تعمد تربيهم على اشدد بهم ازرى واشركهم فى امرى

14/الدعاء ادعيلهم دايما قدام بعض. نقول”اللهم ألف بين قلوبهم واصلح ذات بينهم واهدهم سبل الرشاد”

واخيرا ماتعتمدوش علي بوستات الفيس في تربية اولادكم لان البوست مهما كان مش هيشمل كل الافكار ومش هيرد علي كل الأسئلة لازم تسأل متخصصين مش عيب وتاخد كورسات تربية

وشكرا 😍